Euskadik Nazioartean duen posizioa indartzen du
Euskadik kalitate demokratikoari, erakundeenganako konfiantzari, maila anitzeko gobernantzari, digitalizazioari eta adimen artifizialari buruzko eztabaida globaletan parte hartzen jarraitzen du. Gobernantza, Administrazio Digital eta Autogobernuko sailburu Maria Ubarretxenak Hirien eta Tokiko Gobernuen Munduko Biltzarrean parte hartu du, Tangerren, mundu mailako 3.000 ordezkari instituzional baino gehiagorekin.
Topaketa honek XXI. mendeko erronkei aurre egiteko zerbitzu publikoen belaunaldi berri bat aztertzen du. Euskadik bere posizionamendua indartzen du autogobernu, demokrazia aurreratu eta berrikuntza publikoa partekatuz, kalitate demokratikoaren inguruan arazoak planteatuz.
Ubarretxenak kalitate demokratikoaren eta herritarren konfiantzaren garrantzia finkatu du ekintza publikoan, eta egungo demokrazien erronka nagusia gizartearen eta erakundeen arteko konfiantzaren berreskuratzea dela azpimarratu du.
Euskadik herritarren konfiantza indartzeko funtsezko bost zutabe aurkeztu ditu: gardentasuna, parte-hartzea, osotasun instituzionala, kontu-ematea eta politika publikoen ebaluazioa. Horiek guztiak kalitate demokratikoa indartzea eta erabakiak hobeto hartzea ahalbidetzen dute.
Era berean, autogobernua indartzearen garrantzia azpimarratu da, gizarte kohesioa, lehiakortasun ekonomikoa eta kalitatezko zerbitzu publikoak lortzeko funtsezko tresna gisa.
Ubarretxenak maila anitzeko gobernantza ere nabarmendu du, elkarlanerako aukera handituz. Azkenik, digitalizazioa eta adimen artifiziala erabiliz, lurralde-adimena eta politika publiko hobeak sustatzeko bidean aurrera goazela berretsi du.
Garapen Iraunkorreko Helburua, 18. GJH “Ahots Batuak”, txertatzea bultzatu da, kulturaren eta hizkuntzaren aniztasuna oinarrizko elementutzat hartuz.
