‘Araba, oinak lurrean’ jardunaldi gastronomikoak
Maiatz honetan, ekainean eta uztailean, ‘Araba, oinak lurrean’ izeneko jardunaldi gastronomikoek tokiko produktuari balioa emango diote. Jardunaldiok ‘showcooking’ formatuko zortzi saio eskaintzen dituzte Gesaltza Añanako Almazen jatetxean.
Ekimena establezimendu gastronomiko honek eta Luis Cañasen familiako Bodegas Amaren enpresak elkarlanean sortu dute, Arabako Foru Aldundiko Turismo Sailaren laguntzarekin. Cristina Gonzalez, Arabako Aldundiko Enplegu, Merkataritza eta Turismoko foru diputatuak, jardunaldi hauen aurkezpenean nabarmendu du helburua arabako produktuen sustapena dela, esperientzia berezi bat eskainiz. Goi sukaldaritza eta Arabako Errioxako mahastizaintza eta ardogintzaren historia uztartuko dira.
Beatriz Pascual Almazengo sukaldariak esan du menu bakoitzak ‘Arabari protagonismo handia’ emango diola, Bodegas Amarenen ardoak, Añanako Gatz Haraneko gatza eta tokiko beste hainbat produktu barne. Azkenik, saioen amaieran, ardo dastaketa bat ere egingo da.
