Programak adimen artifiziala erabiltzen du 2.000 aldagai geolokalizatu baino gehiago aztertzeko
Guztira 62 ekintzailek jo dute Gasteizko Udalera beren negozioak non kokatu erabakitzeko 2025eko otsailean abiarazitako ‘Pickgeo’ zerbitzua erabiliz, Maria Nanclares Ekonomiaren Sustapen, Enplegu, Merkataritza eta Turismo zinegotziak bere sailak egindako batzordean astearte honetan iragarri duenez.
Azaldu duenez, «Gasteizen ekintzailetza sustatzeko ‘Pickgeo Location Intelligence’ tresna ezarri genuen, Arabako hiriburuan negozio ideia abian jarri nahi duten pertsonek ideia hori kokatzeko leku egokiari buruzko informazio baliotsua izan dezaten. Adimen artifizialak aukera oso interesgarriak eskaintzen dizkigu laguntza estrategiko horretan».
«Ekintza honetan 62 ekintzailek parte hartu dute, eta Gasteizko 2023-2030 epealdirako Ekintzailetzari Laguntzeko Planaren parte da, hau da, gure hirian jarduera ekonomiko iraunkorra eta enplegu berria sortzeko prestatutako ibilbide orriaren parte», gaineratu du.
Ekimenari esker, Gasteizen negozioa abian jarri nahi duenak inguruari buruzko informazio estrategikoa kontsulta dezake, hala nola biztanleriaren datu soziodemografikoak, kontsumoari buruzkoak, errenta mailari buruzkoak, ibilgailuen trafikoari buruzkoak, mugikortasunari buruzkoak, lehiakideei buruzkoak edo eskuragarri dauden lokalen eskaintzari buruzkoak, eta horrela, bere enpresaren kokapen egokiari buruzko erabakiak optimiza ditzake. Programak adimen artifiziala erabiltzen du 2.000 aldagai geolokalizatu baino gehiago aztertzeko.
Gasteizko Udaleko Merkataritza Zerbitzuak barne dokumentazioko lanketa egin du adimen artifizialeko tresna elikatzeko, negozio ideia berriak inplementatzeko eskuragarri dauden kaleko lokalei buruzko datuekin. Aholkularitza zerbitzua erabili nahi duten pertsonek Udalaren webgunetik eska dezakete (www.vitoria-gasteiz.org).
Egitasmoa Gasteizko merkatuak eta merkataritza eremuak bultzatzeko planean sartuta dago, eta Espainiako Gobernuaren Suspertze, Eraldatze eta Erresilientzia Planak finantzatzen du (plan horrek bideratzen ditu Next Generation Europako Funtsak).
AHOLKULARITZA
‘Pickgeo’ zerbitzua osatuz, Gasteizko Udalak aholkularitza integrala eskaintzen die ekintzaileei, enpresak sortzeko prestakuntza espezializatuarekin, informazio zerbitzuarekin, hamar orduko aholkularitza pertsonalizatuarekin, laguntzekin eta lehen urteetan ezarri ahal izateko haztegiekin. Halaber, hainbat diru laguntza eskaintzen ditu, hala nola autonomoentzako txekea, eta eskuragarri dauden lokalak dinamizatzeko laguntzak.
«Azken batean, abian diren enpresa proiektuen arrakasta izateko aukerak maximizatzeko laguntza sendoa eta eraginkorra bermatzen dugu», azpimarratu du Nanclaresek.
Ekintza horiek guztiak bat datoz Gasteizko Udalak arlo ekonomikoan duen lehentasunezko helburuetako batekin, hau da, hiria ingurune ekintzaile gisa aktibatzea.
