Prozesu parte hartzaileen bidez egindako proiektuen garapena eta diseinua sustatzen duen laguntzen lerroa da
Gasteizko Udalak herritarren partaidetza proiektuetarako 2026ko diru laguntzen deialdi publikoaren ebazpena onetsi du ostegun honetan, eta esleitutako 24.000 euroak era askotako zortzi elkarteren artean banatu dira, aurkeztutako 17 eskaeren artean. Prozesu parte hartzaileen bidez egindako proiektuen garapena eta diseinua sustatzen duen laguntzen lerroa da.
Gasteizko Udalak gogorarazi duenez, urteak daramatza elkarteek sustatutako partaidetza prozesuak bultzatzen. Horretarako, Herritarren Partaidetzarako Udal Zerbitzuak 24.000 euroko kontu saila erreserbatu zuen aurtengo udal aurrekontuan partaidetza prozesuetatik eratorritako gastuak ordaintzeko.
Horrela, diruz lagundu dira metodologia parte hartzailea barne hartzen duten proiektuak, Udalaren ildo estrategikoekin bat etortzeaz gain. Aurkeztutako proiektuen ebaluazio teknikoa egin ondoren, talde bakoitzak 3.500 euro jasoko ditu gehienez.
Zehazki, Manuel Iradier Elkarte Afrikanistak 3.425 euro jasoko ditu, ADIM-EGIEk 3.150 euro, Auzokideak Elkarrekin Elkarte Soziokulturalak 3.150 euro, Geu Gasteiz elkarteak 3.150 euro, Guztion Goikolarra Auzo Elkarteak 3.150 euro, EHUko Arabako campusak 2.535,30 euro, Euskharan Kultur Elkarteak 3.150 euro eta Gasteiz On elkarteak 2.289,70 euro.
Miren Fernandez de Landa Gobernu Irekiaren eta Gizarte Etxeen zinegotziak azaldu duenez, «laguntza horien bidez, proiektuak bultzatuko dituzten parte hartze prozesuen garapena sustatzen jarraitzen dugu. Bide horretatik, azken emaitza parte hartzaileagoa eta pluralagoa izatea lortuko dugu, bizi garen gizartearekin bat etorriz».
«Parte hartzeak proiektu baten fase guztiei edo batzuei eragin diezaieke: diagnostikotik ebaluaziora, proposamenetatik eta kudeaketatik igarota. Erabakiak hartu aurretik egin beharreko gogoeta eta eztabaida beti dira lagungarriak erabakiak bidezkoagoak, anitzagoak eta adierazgarriagoak izan daitezen», adierazi du.
