Gasteizko Udalak bisita gidatu “murgiltzaileak” antolatu ditu
Gasteizko Udalak udaberrian bisita gidatu “murgiltzaileak” eskainiko ditu Goiuri Jauregia “ikuspegi berritzaile batetik ezagutzeko”. Bisita hauek errealitate birtuala, errealitate areagotua, hologramak eta joko interaktiboen bidez egingo dira.
Ekimenaren aurkezpena asteazken honetan egin dute, Gasteizko Ekonomia Sustapen, Enplegu, Merkataritza eta Turismo zinegotzi Maria Nanclaresek, Ismael Garcia-Gomez eta Ramon Diaz de Durana historialariek eta Helice Creativos enpresako Jose Bellidok. Goiuri Jauregia Gasteizko Udalaren jabetzakoa da eta Aihotz plazan dago, “xarma berezia” duen gune batean, edertasun handiko eta arkitektura eredugarriko gunean.
Eraikina 1538an hasi zuten eta Erdi Aroko almendraren hegoaldean dago. Barrualdeko horma batzuk hiriko antzinako goiko harresiaren parte izan ziren, eta fatxada nagusiak galeria-balkoia du, Gasteizko ikuspegirik onenetako bat erakusten duena. Eraikinak irisgarritasun unibertsaleko neurriak ditu, adin eta behar guztietako pertsonek bisitaz gozatu ahal izan dezaten.
Teknologian Amazing Up, Tifloactiva Eulen Art eta Arkikus enpresek lagundu dute. Bisita gidatuak asteazken honetan hasiko dira, eta Aste Santuko egunetan programazio zabala izango da, egunero 3-4 bisitarekin. Erreserbak online, aurrez aurre edo telefonoz egiteko aukera egongo da. Bisiten prezioa pertsonako 5,45 eurokoa da, eta 12 urtetik beherakoentzako doako sarrera izango da.
