Gasteizko tranbia Zabalganara luzatzeko lehen tarteko lanak
Eusko Jaurlaritzako Mugikortasun Jasangarriaren Sailaren mendeko Euskal Trenbide Sareak Cycasa, Amenabar, Bycam eta Abando enpresek osatutako aldi baterako enpresen batasunari esleitu dizkio Gasteizko tranbia Zabalgana auzora luzatzeko hiru tarteetako lehenaren obrak, 8.678.894 euroko kontratuaren truke. Lanak egitekoa 13 hilabete iraungo du, zuinketa akta sinatzen denetik, eta udako sasoian hasiko dira.
ETSk jakinarazi duenez, tranbiaren adar berria Nazio Batuen etorbidean zehar igaroko da, kilometro bateko luzerarekin eta bi geralekurekin: lehena Zabalganako ikastetxe publikoaren ondoan eta bigarrena etorbide horretako 47 zenbakiaren parean. Azken horrek toperak izango ditu -segurtasunez balaztatzeko gailu finkoak-.
Tranbiaren sarea errepidearen bi noranzkoak banatzen dituen erdiko erdibitzaileak hartzen duen espazioantrenbide bikoitza eta lorategidun plataforma berdea izango ditu
Lanketek hiri eta paisaia integrazioko jarduketak barne hartzen dituzte, tranbia plataformaren gainean landare estaldura jartzea, galtzadak, espaloiak eta aparkalekuak birbanatzea, drainatze jasangarria duen egiturazko lurzorua instalatzea edo berriztutako bidegorriak ezartzea. Soluzio horien bidez, hiriko korridore berdea sendotu nahi da.
Itinerarioa eta ardatzak
Tranbiaren luzapenaren helburua da Gasteizko auzorik jendetsuenaren -30.000 biztanle inguru- eta erdialdearen arteko lotura hobetzea, gainerako tranbia sarearekin konektatuz. Mariturriko adarra Zabalgana etorbidearen eta Nazio Batuen arteko biribilgunean hasiko da, eta Sofia Erregina hiribideko 1ean egongo den geltokiraino iritsiko da.
Eusko Jaurlaritzak, Arabako Foru Aldundiak eta Gasteizko Udalak tranbia Zabalganara luzatzeko finantzaketa hitzarmena sinatu zuten joan den urtarrilean. Guztira, Eusko Jaurlaritzak 88,4 milioi euro inbertituko ditu.
