Gasteizko Udaleko gobernu batzordeak Abetxukuko frontoiaren ondoan aparkaleku berria eraikitzeko eta auzoan irisgarritasuna eta mugikortasuna hobetzeko lanak kontratatzeko espedientea onartu du ostiral honetan. Proiektuak 254.144 euroko inbertsioa eta hiru hilabeteko gauzatze epea ditu.
Beatriz Artolazabal Espazio Publikoaren zinegotziak adierazi duenez proiektuak aukera emango duela auzoaren eguneroko bizitzarako bereziki garrantzitsuak diren hiru eremutan jarduteko. «Abetxukun auzotarren benetako beharrei erantzungo diegu, irisgarritasuna, mugikortasuna eta espazio publikoaren kalitatea hobetuko dituzten jarduketekin. Herritarren bizitza errazten duten eta hiri erosoagoa, seguruagoa eta atseginagoa eraikitzen lagunduko duten esku hartzeak dira», azaldu du.
Gaur egun Abetxukuko pilotalekuaren ondoan dagoen kanpoko futbol kantxa lur gaineko aparkaleku bihurtzea izango da jarduketa nagusia. Espazioak 1.000 metro koadro inguru ditu, narriadura handia du eta gaur egun ez du ia erabilerarik.
Aldaketari esker, gaur egun gutxi erabiltzen den eremua aprobetxatu ahal izango da auzoan aparkatzeko plazen eskaera historikoari erantzuteko, zaila baita inguruko kaleetan egindako aldaketen bidez behar horiei erantzutea, eremuaren mugikortasuneko eta hirigintzako ezaugarriak direla eta.
Proiektuak, gainera, Arakako tranbiaren geltokia Plaza Nagusiarekin eta Iturrizabala kalearekin lotzen duen oinezkoentzako ibilbidearen berrikuntza integrala barne hartzen du. Herritarrek gehien erabiltzen duten ibilbideetako bat da, eta Zadorra adinekoen egoitzarako ohiko sarbidea. Obrek bide zorua erabat berritzea ahalbidetuko dute, irisgarritasuna hobetzeko eta erabiltzaileen segurtasuna indartzeko, batez ere mugikortasun murriztua dutenena edo mugitzeko laguntzak erabiltzen dituztenena.
Hirugarren jarduketa Iturrizabala kaleko kale itsuan egingo da, gaur egun ibilgailuek biraketa maniobrak egiteko zailtasunak baitituzte aparkaleku librerik topatzen ez dutenean. Egoera hori konpontzeko, kalearen amaieran dauden azken plazak kenduko dira, eta maniobra eremu espezifikoa egokituko da, noranzko aldaketak modu erosoagoan eta seguruagoan egiteko, atzerakako maniobrak saihestuz eta ibilgailuen eta oinezkoen arteko bizikidetza hobetuz.
